Мулоқот бо намояндагони Афғонистон
19 майи соли ҷорӣ дар Вазорати рушди иқтисод ва савдо мулоқоти Вазир, Шариф Раҳимзода бо ҳайати бонуфузи Ҷумҳурии Исломии Афғонистон, ки таҳти роҳбарии Вазири тиҷорат ва саноеи ин кишвар, ҷаноби Муҳаммад Шокир Коргар ба Душанбе ташриф овардаанд, баргузор гардид.
Иқтисод ва тиҷорат, сармоягузорӣ, тавсеаи нуқтаҳои савдои наздисарҳадӣ, рушди фаъолияти минтақаҳои озоди иқтисодӣ аз мавзуъҳои калидии гуфтугузорӣ ҳайатҳо маҳсуб гардид.
Дар ҷараёни мулоқот ҷонибҳо ҷиҳати дар муҳлатҳои кӯтоҳтарин таҳия ва ба тасвиб расонидани Созишномаи тиҷорати транзитӣ байни Ҷумҳурии Тоҷикистон ва ҷумҳуриҳои исломии Афғонистону Покистон мароқ зоҳир намуданд.
Дар интиҳои мулоқот атрофи масъалаҳои ҷорӣ ва дурнамои рушди ҳамкориҳои мутақобилан судманд мубодилаи афкор сурат гирифт.
